Nanotechnologie

Unta Nanotechnologie, kuaz Nanotech, vastähd ma de Manipulation vo Materie af atomara, molekulara und submolekulara Ebane.

Nanomaterialien spuin heit scho a bedeitande Roin. Se wean voa oim mid kemischn und mechanischn Methoden heagstejt. De Mikrotechnik nimmt de Nanotechnologie ois Daweitarung (Top-down Osotz), d. h. ma kimmt vom Grässan zan Kloanan. De Kemie orbat dagegn umgekeaht. Aus oanzlnan Molekuin wean grässare Struktuan afbaut (Bottom-up Osotz), beispuisweis de Dendrimere.

De genaue Definition vo Nanotechnologie is umstriddn. Wann ma s nua iba de Gräss definiad, nacha is as Owendungsfejd riesig. Vo da Obaflechntechnologie iba de organische Kemie, de Molekularbiologie, Hoibloatatechnik bis zua Mikroproduktion und so weida.

So wia ba da Gentechnik gibts oba aa Schrecknsszenarien, de wo de Nanotechnologie vauasochn kunnt. Es wead vo bstimmt Leidln ognumma, dass Nanobots beispuisweis an Wejduntagang ausläsn kunntn. Ma red in dem Zammahang vom Graue-Schmia-Szenario (engl. gray goo): Kloawinzige Robota, sognennte Nanobots, kunntn si solang sejm reproduzian bis de Ressourcen vo da Eadn komplett afbraucht san.